Umthethwandaba waphezulu weHigh Court ko Bulawayo uthi iziphathamandla zenhlanganiso ye Mthwakazi Liberation Front, ezibotshwe ngeviki edluleyo zisetheswa icala lokuzama ukugenqula uhulumende zizakuzwa ngolweSihlanu ukuthi icala lazo liyalahlelwa khatshana kumbe hatshi.
Ngakwelinye icele, umthethwandaba weHigh Court waseHarare lawo uthi isiphathamandla secele le MDC elikhokhelwa nguMnu. Morgan Tsvangirai, uMnu. Douglas Mwonzora lamalunga edlula amatshumi amathathu abotshwe ngenyanga edluleyo azakuzwa ngoLwesihlanu ukuthi ayakhululwa ngokuhlaula imali yesibambiso se bail kumbe hatshi.
UMnu. Matshobana Ncube, igqwetha elimela iziphathamandla ze Matabeleland Liberation Front, utshele uSithandekile Mhlanga we Studio 7 ukuthi kusobala abathathu laba, ababalisa uMnu. Paul Siwela, uMnu. John Gazi kanye loMnu.Charles Gumbo kabalacala.