URegistrar General uMnu Tobaiwa Mudede uthi uluhlu lwabalelungelo lokuvota luhlanzekile njalo bonke abakuloluluhlu ngabantu abazavota kukhetho oluzayo.
Amazwi la sesolwe yiMDC labenhlanganiso ezizimeleyo besithi kuyadingeka ukuthi uluhlu lolu lulotshwe kakutsha ngoba lumumethe amagama abantu asebafayo alokhu engakakhitshwa.
UMudede utshele umsakazo weZBC ukuthi uluhlu lolu lulabantu abayizigidi phose ezingamatshumi ayisithupha, 5,8 million.
Umsekeli wesikhulumeli seMDC-T, uNkosazana Thabitha Khumalo uthi imbiko kaMudede ayiqondanga, esithi uhambe wayahlola uluhlu lolu wathola kulabantu abedlula itshumi abalotshwe ukuba bahlala endlini yakhe angabayaziyo.
Ingcwethi ecubungula ezombusazwe uMnu Dumisani Nkomo ugcizelele amazwi kaMaKhumalo esithi uluhlu olukhona kathesi kumele lubhalwe kakutsha.
