amalinks wokungena

Breaking News

'UMugabe Kahloniphe Ilungelo Loluntu Nxa Efuna Izijeziso Zesulwe'


Inhloko kahulumende yeBhilithani uMnu Gordon Brown uthi uhulumende wakhe ufuna eleZimbabwe lilondoloze amalungelo kazulu njalo lihloniphe imithetho yalo ukuze izijeziso ezafakelwa uMongameli Mugabe labanye bakhe kuZanu PF zesulwe.

U Brown wethule amazwi la ngoLwesine eseLondon ngemva kokuhlangana loMongameli Jacob Zuma weSouth Africa, yena ocele iBhilithani kuhambo lwakhe kulelo lizwe ukuthi ikhuthaze ukwesulwa kwezijeziso lezi esithi, zenqabela intuthuko.

Kodwa uBrown ukwalile lokhu esithi izijeziso lezi ziphazamisa iziphathamandla zeZanu PF kuphela hatshi uzulu weZimbabwe jikelele. Wengeze wathi nxa abeZanu PF befuna izijeziso zesulwe kumele baguqule izenzo.

UMongameli Zuma yena uthe izijeziso lezi zingaqhubeka zikhona zizabangela ukuthi ezinye iziphathamandla zeZanu PF ziqhubeke zivimba imizamo kahulumende womanyano yokuvuselela ilizwe.

Umqondisi wenhlanganiso yeBulawayo Agenda uNkosikazi Anastacia Moyo utshele uNtungamili Nkomo weStudio 7 ukuthi akumangalisi ukuthi uZuma wehlulekile ukusuthisa iBhilithani ukuthi yesule izijeziso zeEU, ngoba kungakabi lenguquko eqotho elizweni.

Kunjalo nje uMongameli Mugabe uthi ibandla lakhe lizimisele ukusebenzelana lenhlangothi zombili zeMDC kuhulumende womanyano. Ekhuluma lentathelizindaba emhlanganweni oqhutshelwe eHarare, uMugabe uthe inkulumo phakathi kweZanu PF leMDC ziyaqhubeka, esithi ulethemba lokuthi konke okuhluphayo kuzalungisiswa.

Ebuzwa ngokuthi uzatshiya nini intambo zombuso, njengomkhokheli weZanu PF, uMugabe walile ukuphendula lumbuzo esithi ayisumlandu wentathelizindaba ukwazi ngokusuka kwakhe ukuba ngumkhokheli webandla lakhe.

‚Äč
XS
SM
MD
LG