amalinks wokungena

Breaking News

UMugabe Kalalungelo Lokubeka Ilanga Lokhetho Eyedwa - Tsvangirai


UMongameli Mugabe sephe amalunga ebandla lakhe akukomidi ekhokhela uhlelo lokulotshwa kwesisekelo sombuso esitsha, umlandu wokuthi kusiyafika ngoLwesithathu abe seqedile ukulungisisa zonke izinto ezilokhu zihlupha phezu kokumele kungene kusisekelo.

Isikhulumeli seZanu PF, uMnu Rugare Gumbo uthi ibandla lakhe liphatheke kubi ngokwehluleka kweManagement Committee ukuvumelana phezu kwezinto ezithile ezigoqela ukuzibusa kwezabelo kanye lokuthi ilizwe kumele libe labasekeli bakaMongameli abangaki.

Okunye okusahluphayo ludaba lokuthi izizalwane zeZimbabwe ezihlala kwamanye amazwe kumele zivunyelwe na ukuqhubeka zilelungelo lokuba yizizalwane zeZimbabwe ezipheleyo, idual citizenship. Lokhu yinto efunwa yiMDC lozulu jikelele, kodwa iZanu PF iyakwala.

Ekhuluma ngoLwesihlanu emhlanganweni weZanu PF Central Committee, uMugabe uthe ufuna ukhetho lokubuza uzulu ukuthi uyasamukela yini isisekelo sombuso kumbe hatshi, lwenziwe ngenyanga ezayo.

Uthe kungehlula lokho, uzabeka ilanga okumele kwenziwe ngalo ukhetho esithi sediniwe ngohulumende womanyano.

Kodwa ekhuluma lentathelizindaba ngoMvulo, inhloko kahulumende uMnu Morgan Tsvangirai uthe uMugabe ngeke akwenze lokhu engazange avumelane lamanye amabandla akuhulumende wenkazatho.

La ngamazwi agcizelelwe ngumqoqi wenhlelo zeMDC ekhokhelwa nguMnu Welshman Ncube, uMnu Qhubani Moyo.

Kunjalo nje, uTsvangirai ukhuthaze uhulumende ukuthi esebenze ngamandla ukudingela uzulu ukudla ngoba ilizwe libhekane lendlala emangalisayo lonyaka. Izulu libe lilutshwana lonyaka, okwenze inengi langatholi lutho emasimini.

XS
SM
MD
LG