Umongameli Robert Mugabe use Windhoek eNamibia emhlanganweni wenkokheli zamabutho kanye lezamaqembu aletha uzibuse emazweni angezansi yezwakazi le Africa. Lumhlangano ngowokucubungula indlela zokulondoloza inkululeko yamazwe abo, lendlela abangazivikela ngayo kwabakubiza ngokuthi luncindezelo lwamazwe aphetsheya.
Amabandla athe gwaqa eWindhoek abalisa i African National Congress ye South Africa, i SWAPO ye Namibia, i Frelimo ye Mozambique, kanye le Chama Chamapinduze ye Tanzania njalo umongameli Mugabe usekhukulumisane lezinye inkokheli zalamazwe.
Lokhu kwenzakala umanyano we SADC ulungiselela umhlangano ozabakhona eAngola kuviki ezayo lapho okuzaxazululwa okuhluphayo kuhulumende womanyano eZimbabwe.
Lokhu kulempikisano phakathi kwamabandla akuhulumende womanyamo ngokuphathelene lokhetho, ezomvikela, lokunye okunengi-nengi.
UMnu. Jorum Gumbo, isikhulumi sebandla le ZANU PF, utshele uSithandekile Mhlanga weStudio 7 ukuthi ibandla lakhe lokhu ligcizelela ukuthi udaba lwabazomvikela lungaguqulwa njengalokhu okufunwa ngamanye amabandla akuhulumende womanyano.
.