amalinks wokungena

Breaking News

UMugabe, UMutambara LoTsvangirai Bamanyana Emizameni Yokuhuga Abamabhizimusi Akwamanye Amazwe


Abakhokheli bamabandla akuhulumende womanyano eZimbabwe babambene ngoLwesine bacela amankampani akwamanye amazwe ukuthi azevula amabhizimusi ngobunengi bawo elizweni.

Inhloko kahulumende uMnu Morgan Tsvangirai, umsekeli wakhe uMnu Arthur Mutambara loMongameli Robert Mugabe bethule isicelo lesi emhlanganweni weWorld Economic Forum oqhutshelwa kweleTanzania.

Lanxa ibandla leZanu PF ngoLwesithathu belithe uMongameli Mugabe kasoze angene emhlanganweni lo, uMugabe ungenile wabambana loTsvangirai kanye loMutambara ekuceleni amankampani akwamanye amazwe ukuthi aze eZimbabwe.

Abathathu laba bavikele njalo umthetho we Indeginisation and Economic Empowerment Act besithi umthetho lo ujonge ukuthuthukisa abensundu kwezenotho hatshi ukuhluthuna amabhizimusi abakwamanye amazwe.

UMutambara yena usole amazwe afana leMelika leBhilithani ngokwala ukwesula izijeziso azifakela uMongameli Mugabe labanye bakhe kuZanu PF abedlula amakhulu amabili.

UTsvangirai yena uthe umumo kwezombusazwe sumuhle kakhulu eZimbabwe, esithi ngalokhu osomabhizimusi bakwamanye amazwe kumele baze ngobunengi elizweni.

Usomabhizimusi njalo eyisiphathamandla seAffirmative Action Group uMnu Sam Ncube uthi uhulumende womanyano ulomthwalo onzima emizameni yokuhuga amankampani akwamanye amazwe ukuthi aze eZimbabwe.

Kusenjalo, uSithandekile Mhlanga uxoxe lengcwethi ecubungula ezombusazwe uMnu Bekithemba Mhlanga endawonye loMnu Edwin Ndlovu, owecele eMDC elikhokhelwa nguMnu Arthur Mutambara ukuze sizwe imbono yabo ngaloludaba.

‚Äč
XS
SM
MD
LG