amalinks wokungena

Breaking News

UMugabe Uphenduka Elizweni Ekhanya Eziphilele Lanxa Bekuthiwa Ugulela Ukufa


UMongameli Mugabe uphenduke elizweni ngoLwesine evela eSingapore ekhanya eziphilele lanxa elinye iphephandaba lebulejini like labika ukuthi ubesegulela ukufa njalo eselatshwa kulelolizwe.

UMugabe ufike eHarare ekuseni lapho ahlangabezwe khona ngomunye wabasekeli bakhe uNkosikazi Joyce Mujuru lezinye iziphathamandla zeZanu PF, egcekeni lendizamtshina.

Umphathintambo obona ngokwethulwa kwemibiko, ongomunye wabahlangabeze uMugabe, uMnu Webster Shamu utshele intathelizindaba ukuthi uMugabe uqine saka njalo uziphilele.

UShamu utshele intathelizindaba lezi, ebezibuthene egcekeni leHarare International Airport ngesikhati uMugabe etheleka, ukuthi ziboloba indaba eziliqiniso phezu ngoMugabe zitshiyane lokubhala amanga.

Ngehola lika 9 O'clock ekuseni, uMugabe ungene umhlangano wabaphathintambo bakahulumende, wona oze waphela ngehola lesibili emini.

Omunye wabaphathintambo ongathandanga ukuqanjwa ngegama utshele iStudio 7 ukuthi uMugabe ubekhanya eziphilele njalo eqinile, lanxa ekhanya ukuthi ngumuntu oseluphele.

Iphephandaba elimemethekise limbiko lona lethule umbiko ngoLwesine lixolisa kakhulu kuMugabe lemmuli yakhe ngokuloba amanga ngaye.

XS
SM
MD
LG