UMongameli Robert Mugabe sesole kakhulu ukudonselana okukhona kuZanu PF esithi kudabula phakathi ibandla.
Ekhuluma kumakhulu abantu emngcwabeni kamuyi uMnu Edson Ncube emathuneni amaqhawe eNational Heroes Acre, uMugabe uthe njalo bakhona kubandla lakhe abasebenzisa imali ukuthenga amavoti, okungumkhuba athe kumele uphele.
UMugabe uchaze umuyi njengeqhawe elalizinikele ukusebenzela ibandla. UNcube ubhubhe ngeviki edluleyo njalo wayeseleminyaka yokuzalwa engamatshumi ayisikhombisa lane, 74.
Ukhuthaze njalo amalunga ebandla lakhe ukuba amanyane ngoba kuyikho kuphela okungaphathisa ukunqoba khetho oluzayo olukhangelelwe ukwenziwa ngemva kokulotshwa kwesisekelo sombuso esitsha.
Ukudonselana kuZanu PF kubikwa kuphakathi kukankosikazi Joyce Mujuru loMnu Emmerson Mnangagwa bona abalwela isikhundla sikaMugabe nxa engasuka embusweni.
Umuyi, obesaziwa ngelokuthi “Nkosi Butcher” ngesikhathi sempi ekubandla leZapu, utshiye amadodana amahlanu lendodakazi.
Ingcwethi kwezombusazwe uMnu Dumisani Nkomo utshele iStudio 7 ukuthi uMugabe kumele aluphathe ngonanzelelo loludaba ngoba lulakho ukudliliza ibandla lakhe.
