UMongameli Robert Mugabe ngoLwesihlanu, uvule okumsethweni ikolitshi le Ezekiel Guti University edolebheni le Bindura.
Lelikolitshi le Ezekiel Guti lakhelwe epulazini ebelibikwa lingelikaMnu. Charles Chakumba, kwadala inkulumo lokuxokozela ngoba wayethi walabelwa efuna ukwemba igolide, kwadonselanwa, waze wacina esekhweze loludaba emthethwandaba wona owacina ululahlela khatshana.
Esuka emkhosini wokuvula ikolitshi leZEGU uMugabe. udlulele waya emhlanganweni labasekeli babandla lakhe eleZanu PF, abanye abawuchaze njengesehlakalo sakuqala sokukhankasela ukhetho luka 2018.
Emazwini akhe uMugabe uthe wonke umuntu uzathola ukudla kungakhathalekile ukuthi ngowebandla liphi. Wavuma ukuba kulodubo lokusilela kwezimotha zokuthwala ukudla kodwa wathi loludubo luzalungisiswa.
UMugabe, obekhatshwe ngumkakhe uNkosikazi Grace, wazise ukuba udaba lokukhulumisana labalwa impi yenkululeko luzaxazululwa ngeviki ezayo. Watshela lumbuthano ukuba kulabanye abasekeli bebandla lakhe abatshela abavela elizweni leChina ukuba abasafunwa nguzulu wezimbabwe, esithi kuzamele lokhu kuphume mgceke emhlanganweni weCongress.
Ukuhlaziya loludaba uChris Gande weStudio Seven uxoxe lengcwethi kwezombusazwe, uMnu. Nhlanhla Dube othi uMongameli Mugabe uzathwala nzima ukudinga usekelo ngoba engenelisanga ukufeza izithembiso azenza kukhetho oluka2013.
"Sokuzamele adinge elinye icebo lokukhankasa ngalo, ngoba abantu abakakhohlwa ukuthi wabathembisa ize, imisebenzi ayithembisayo kayikho ngakhoke yena lebandla lakhe bazazama ukudinga okunye okokugcona ukuze bavike ngakho ukuthi yikho okwabenza behluleka ukufeza izithembiso"
