Umphathintambo obona ngobudlelwano lamanye amazwe njalo eyisiphathamandla secele le MDC elikhokhelwa nguMnu. Arthur Mutambara, uNkosikazi Priscilla Misihairabwi Mushonga, ube lomhlangano lentathelizindaba ngolweSibili eHarare lapho aveze khona ukuthi usetshiyela abakwabozala impahla yomkakhe, umuyi uDokotela Christopher Mushonga obhubhe nyakenye, ngoba bemhlukuluza.
UMushonga uthi lanxa umuyi wayekuveze sobala ukuthi nguye okufanele athathe limpahla, abakwabozala baqhubeke bemthwalise amagabha avuzayo,njalo sebethumela lamapholisa ukuthi ahlukuluze abangakibo, abagoqela umnewabo.
UMushonga utshele uSithandekile Mhlanga we Studio 7 ukuthi katholanga usizo emthethweni yelizwe ebona ngelifa, kanye lenhlanganiso izilwela amalungelo abesifazane, ngakho usesuka endlini yakhe lomkakhe, ayedinga lapho azacatshisa khona ikhanda.
