Ibandla le ZANU PF selixotshe iphathamandla salelibandla, uNkosikazi Tracy Mutinhiri, omela i Marondera East edale lephalamende lisithi kalandeli imithetho lendlela okumele aziphathe ngayo kulelibandla.
Isikhulumi salelibandla, uMnu. Jorum Gumbo uthi isinqumo sokuxotsha uMutinhiri sithethwe lidale lePolitburo yalelibandla ngolweSithathu njalo kusacutshungulwa ukuthi kwenziweni ngezikhundla zakhe, ezigoqela esikamsekeli kamphathintambo wogatsha olubona ngezisebenzi.
Ekhuluma le Studio 7, uNkosikazi Mutinhiri usole ezinye iziphathamandla zalelibandla ezethesa umlandu wokumxotshisa, njalo walandula ukuthi ulobudlelwano lebandla le MDC elikhokhelwa nguMnu. Morgan Tsvangirai, kanye lokuthi kalandeli imithetho yebandla.
USithandekile Mhlanga we Studio 7 uxoxe loMnu. Charles Mpofu, owake waba yisiphathamandla se ZANU PF ukuze sizwe imbono yakhe ngaloluda.