amalinks wokungena

Breaking News

UObama Usola Umbuso KaMongameli Mugabe


UMongameli Barack Obama weMelika uyamsola kakhulu uMongameli Mugabe esithi ngumuntu oloncindezelo oqhubeka ngumbuso wakhe omubi esephula njalo ilungelo loluntu.

Ekhuluma emhlanganweni awenzele esigodlweni sakhe seWhite House eWashington DC labatsha abavela emazweni atshiyeneyo eAfrica ngoLwesibili oweYoung African Leaders, uObama uthe ulokudana okukhulu ngombuso kaMugabe.

UMongameli Obama wengeze wathi inhliziyo yakhe ibuhlungu kakhulu ngokwenzakala eZimbabwe.

Ekhuluma ngodaba lwezijeziso ezethulelwa iziphathamandla zeZanu PF yiMelika, uObama uthe lanxa elesifiso sokusebenzelana kuhle leZimbabwe, uhulumende wakhe kasoze esule izijeziso lezi kungakabi lenguquko ekhanyayo kwezombusazwe.

Isikhulumeli sebandla leZanu PF uMnu Rugare Gumbo usole amazwi kaObama esithi uMugabe ngumkhokheli omuhle, ohlonipha amalungelo kazulu.

Abaphatheke emhlanganwei weYoung African Leaders lo ngabasakhulayo abavela emazweni atshiyeneyo ezwekazi leAfrica abagoqela abeZimbabwe abathi uNkosazana Cleopatra Ndlovu, uMnu Sydney Chisi, ongumkhokheli we Youth Initiative for Democracy in Zimbabwe loMasimba Nyamanhindi owe Student Solidarity Trust.

Umhlangano lo uqale ngoMvulo njalo uphela ngoLwesine. Injongo yawo ngeyokukhuthaza abatsha ukuthi babe ngabakhokheli abalohlonzi njalo abahlonipha ilungelo loluntu kwelakusasa.

‚Äč
XS
SM
MD
LG