Umkhokheli welinye lamacele eMDC njalo eyinhloko kahulumende uMnu Morgan Tsvangirai uqhube umhlangano labameli bamazwe atshiyeneyo eZimbabwe ngoLwesine ebazisa ngempumela yomhlangano weSadc ohlaziye udaba lweZimbabwe ngoMvulo kweleNamibia.
Abameli bakwamanye amazwe laba babalisa abeMelika, abeBhilithani labamanye amazwe atshiyeneyo agoqela awezwekazi leAfrica. Eqeda lapho uTsvangirai uhlangane njalo labenhlanganiso ezizimeleyo wazazisa ngokufanayo.
Emihlanganweni yomibili uMnu uTsvangirai uthe ibandla lakhe likhangelele ukuthi kwenziwe ukhetho ekupheleni kokulotshwa kwesisekelo sombuso esitsha.
Wazise ahlangane labo laba ngezinqumo zeSadc ezigoqela esokuthi kugcwalisiswe isivumelwano seglobal political agreement ngokuphangisa.
Olunye udaba abika eluphethe ngolwezijeziso. ISadc ikhuthaze ukwesulwa kwalezi zijeziso, ezethulelwa eleZimbabwe ngamazwe angentshonalanga.
Abakuhulumende womanyano bahlezi bekhankasela ukwesulwa kwezijeziso lezi njalo umkhankaso wabo ukhanya uphumelela ngoba iMelika, engenye yamazwe ethulela iZimbabwe izijeziso, iphakathi kokuqoqa umthetho othiwa yiZimbabwe Sanctions Repeal Act wona ozakwesula umthetho owaletha izijeziso lezi oweZimbabwe Democracy and Economic Recovery Act.
Obemela eleSweden eZimbabwe uMnu Sten Rylander ukhuthaze ukwesulwa kwezijeziso yi European Union kuliviki, ephetha umsebenzi wakhe wokuba ngumeli walelolizwe eZimbabwe.
Ukuhlaziya udaba lwezijeziso lolu uNtungamili Nkomo oweStudio7 uxhume ingcwethi ezicubungula ezombusazwe uMnu Brilliant Mhlanga loMnu Bhekilizwe Ndlovu osebenza lenhlanganiso yeUnion for Sustainable Democracy.
