Inhloko kahulumende njalo engumkhokheli welinye lamacele e MDC uMnumzana Morgan Tsvangirai ukhangelelwe ukuza kweleMelika ukuzokwamukela isichocho senhlonipho azasiphiwa yinhlanganiso yeNational Democratic Institute- N-D-I.
UTsvangirai uzaphiwa isichocho se W. Averell Harriman ngemisebenzi yakhe yokuzama ukuletha umbuso okhululekileyo elizweni, ukuhlonitshwa kwelungelo loluntu lokulondolozwa komthetho.
UTsvangirai uzaphiwa lesisichocho emkhosini wokuthakazelela ukufikisa iminyaka engamatshumi amabili lanhlanu kwenhlanganiso ye N-D-I, ozakwenzelwa eWashington DC eMelika, ngoMvulo ntambama.
Uzaphiwa lesisichocho endawonye leyinye inhlanganiso yabesifazane yakwele Colombia ethiwa Choco Women of Columbia.
Ingcwethi ecubungula ezombusazwe uMnumzana Mqondobanzi Magonya utshele uBrenda Moyo weStudio 7 ukuthi kuhle ukuthi uTsvangiari athole lesichocho ngoba ehlukuluzwe kakhulu nguhulumende kaMongameli Robert Mugabe ngesikhathi ezama ukukhulula imuli yeZimbabwe ebunzimeni.
