Inhloko kahulumende uMnu Morgan Tsvangirai ngolweSihlanu ucele amazwe angentshonalanga ukuthi esule izijeziso azethulele iziphathamandla zeZanu PF eminyakeni edluleyo.
UMnu Tsvangirai ukhuthaze njalo abamabhizimusi ukuthi baze ngobunengi babo kweleZimbabwe bazevula amankampani.Wethule amazwei la ese Switzerland ekhuluma lentathelizindaba.
Omunye wabasekeli bakhe uMnu Arthur Mutambara laye ukhuthaze ukwesulwa kwezijeziso kungxoxo ayenze leStudio 7 laye ekhuluma ese Switzerland lapho abaphatheka khona emhlanganweni wokudinga indlela zokuvuselela inotho yamazwe omhlaba.
UMnu Tsvangirai uthe njalo ukhangelele ukuthi kwenziwe ukhetho ngomnyaka ozayo. Ingcwethi ecubungula ezombusazwe uMnu Rejoice Ngwenya utshele uNtungamili Nkomo weStudio 7 ukuthi uTsvangirai uyaphambanisa ngokukhankasela ukwesulwa kwezijeziso.
