UMongameli welinye lamacele eMDC, uMnu. Morgan Tsvangirai wazise ukuthi uzadinga ukuhlangana labanye bakhe abakuhulumende womanyano bakhulumisane ngodaba lodlakela oseluhlasele uhlelo lokuqoqa imbono kazulu ezangena ekulotshweni kwesisekelo sombuso. UTsvangirai ukhulume lokhu emhlanganweni lentathelizindaba ngemva kokwazisa ngemfa yomunye umsekeli webandla lakhe, uMnu. Chrispen Mandizvidza otshwaywe ngabacatshangelwa ukuthi ngabasekeli beZanu PF emhlanganweni weCOPAC ngempelaviki.
UTsvangirai uthi sekusobala ukuthi isisekelo esizalotshwa kasisoze siveze izifiso zikazulu. Lokhu kwenzakala sekulembiko ethi abanye abasekeli beMDC abayabe betshaywe ngabasekeli beZanu PF nxa besiyamangala lamacala emapholiseni kubotshwa bona.
Emangweni we Gokwe izakhamizi zibikwa zingasalali ezindlini ngoba zisesaba ukutshaywa ngabasekeli beZanu PF. uChris Gande weStudio 7 ukhulume lomsekeli wesikhulumeli sebandla leMDC elikhokhelwa nguMnu. Tsvangirai, uNkosazana Thabitha Khumalo othi udlakela luya luqhela ezigabeni zelizwe.