Sokuqhamuke umkhuhlane wezilonda ezicatshangelwa ukuthi zingaba ziphathelane lomkhuhlane wendingingi obikwa usuhlasele kakubi indawo yeChipinge esigabeni seManicaland.
Abaphethe ezempilakahle kulesisigaba bakhanya besehluleka ukuvimba ukumemetheka komkhuhlane lo njalo isibhedlela esikulo umango sibikwa sibhadalisa abafuna ukwelatshwa amadollar alitshumi lanhlanu eMelika.
Lokhu kubikwa kuletha ubunzima ebazalini abafisa ukwelaphisa abantwababo asebehlaselwe ngumkhuhlane lo.
Kusenjalo inhlanganiso ebona ngezempilakahle emhlabeni jikelele eye World Health Organisation ibika ukuthi umkhuhlane wendingindi wona oqhamuke elizweni ngenyanga ka Mpandula nyakenye usuhlasele izigaba phose ezingamatshumi amahlanu zelizwe- 48.
I WHO ithi kusiya fika ngoMbimbitho odluleyo umkhuhlane lo ubusuhlasele abantu abedlula inkulungwane ezintathu- 3,285 kodwa abangamakhulu amathathu kuphela yibo abaveze ubufakazi bokuthi bahlatshwa amajekiseni okuvikela indingindi.
Umkhuhlane lo ubikwa umemetheke kakhulu kwabokholo lwesipositoli ngemva kwemibuthano yekhefu le Pasika. Abokholo lolu babikwa bengelatshwa uma begula njalo abahlabisi abantwababo amajekiseni okuvikela imikhuhlane.
Ugatsha lwezempilakahle lumanyene lenhlanganiso ye uNICEF luthi luzaqinisa uhlelo lokuhlabisa abantwana amajekiseni okuvikela imikhuhlane elizweni lonke jikelele ngenyanga ezayo.
Ukuze sizwe ezinye izibonakaliso zomkhuhlane wendingindi, UBrenda Moyo oweStudio 7 uxhume ingcwethi emikhuhlaneni yabantwana udokotela Dalubuhle Ndiweni ochasisa amanyathelo athathwa ngabezempilakahle uma umkhuhlane lo usuhlasele.
