amalinks wokungena

Breaking News

Uzulu Ufuna Bajeziswe Ababangela Udlakela - Zimrights


Inhlanganiso ekhankasela ukulondolozwa kwelungelo loluntu, iZimrights yethule ugwalo lwayo ngolweSithathu olukhomba ukuthi uzulu weZimbabwe ufuna kujeziswe bonke ababangele udlakela lwezombusazwe nyakenye.

Ekhuluma emkhosini wokwethula ugwalo lolu eHarare kulandela ukudingisisa okwenziwe yinhlanganiso le, umqondisi weZimrights uMnu. Okay Machisa uthe uzulu ulesifiso sokuthi abenza ubudlwangudlwangu phambilini kokhetho lwanyakenye bajeziswe kabuhlungu.

Ibandla leMDC elikhokhelwa nguMnu Morgan tsvangirai lithi kulabasekeli balo abedlula amakhulu amabili ababulawe ngabasekeli beZanu PF kudlakela lolu, kanti leZanu PF layo ithi kulabasekeli bayo ababulawe yizikliwi zeMDC.

Ekhuluma embuthwaneni munye umsekeli kamphathintambo wezemithetho, uNkosazana Jessie Majome uthe kuqakathekile ukuthi kubunjwe ikomishini ezabona ngezelungelo likazulu.

Kodwa uNkosazana Majome uthe akumelanga ikomishini le ibe ngaphansi kukahulumende ngoba ezinye izigilamkhuba ezabangela udlakela lolu zilokhu zikuhulumende.

UMajome wengezelele wathi abenza isihluku seGukurahundi labo kumele bajeziswe. Impi yeGukuradundi le - yona eqale ngo1982 yaphela ngo1987 - ibulalise abantu abedlula inkulungwane ezingamakhulu amabili, becobodiswa libutho likaMongameli Robert Mugabe ele Five Brigade.

Ilunga leZimrights uMnu. Clemence Moyo utshele uChris Gande weStudio 7 ukuthi kulokhu kulokufuthelana enhliziyweni zabantu abanengi ngenxa yobudlwangudlwangu obenziwe phambilini kokhetho lwanyakenye.

‚Äč
XS
SM
MD
LG