Impumela yokudingisisa okwenziwe yinhlanganiso yeFreedom House ikhomba ukuthi inengi labantu beZimbabwe lifuna kuqiniswe umbuso wentando kazulu ngokwehliswa kwesikhathi uMongameli welizwe amele abuse ngaso.
Impumela le yethulwe yinhlanganiso yeMelika, iFreedom House ngolweSihlanu eJohannesburg. Ukudingisisa lokhu kwenziwe yinhlanganiso yeAfrobarometer le Mass Public Opinion Institute of Zimbabwe zisebenza ziphansi kwempiko zeFreedom House.
Impumela le iveza ukuthi isilinganiso sokungamatshumi ayisikhombisa lantathu ekhulwini sabantu abayinkulungwane lamakhulu amabili abaphatheke kuhlelo lokudingisisa imbono kazulu iveze ukuthi bafuna kuqhutshwe ukhetho phakathi kweminyaka emibili ezayo.
Esethula impumela le kuntathelizindaba eJohannesburg, umsekeli womqondisi wenhlelo zeFreedom House, uMnu Daniel Calingaert uthe inhlanganiso yakhe ilethemba lokuthi uhulumende uzalandela izifiso zikazulu, ikakhulu kudala lokhetho olutsha.
