Inengi labantu elizweni jikelele lithakazelele ilanga lekhisimusi ngolweSihlanu, lisithi ikhisimusi yalonyaka ibingcono kakhulu ukwedlula amanye amakhasimusi edluleyo, ngoba ukudla sokutholakala ezitolo ngentengo ephansi.
Ezitolo ezinengi kubikwa bekuphithizela ngolweSihlanu, abantu bethenga impahla ezitshiyeneyo, kukanti abanye bebezithokozisa ngokwenza amadili.
Isiphathamandla somanyano weChristian Alliance uMfundisi Promise Manceda, utshele iStudio 7 ukuthi amabandla aholisa abaswelayo ukudla njengensukwini, kungakhathalekile ukuthi lilanga lekhisimusi kumbe hatshi.
UMayor wedolobho lako Bulawayo, uMnu Patrick Thaba Moyo utshele uSithandekile Mhlanga we Studio 7 ukuthi uhlelo lwekhansili olwe Mayor’s Christmas Cheer Fund luncedise abantu abedlula inkulungwane ezinhlanu ngokudla, izigqoko, imali, lokunye okunengi-nengi.
Abalaleli beStudio 7 endaweni ezitshiyeneyo zelizwe abakhulume loBrenda Moyo baveze ukuthi ikhefu lekhisimusi balinenze ngendlela ezitshiyeneyo.
