amalinks wokungena

Breaking News

Uzulu Uthukuthele Ngenotho KaMnu Chombo


Uzulu seveze ukuthukuthela okukhulu ngenotho kaMnu Ignatias Chombo, ongumphathintambo obona ngokusebenza kwamakhansili.

Amaphepha aphambi komthethwandaba lapho uChombo adinga ukwehlukaniswa loNkosikazi wakhe ngokusemthethweni, aveza ukuba uyinkisela yaseMgungundlovu engela mota eyodwa kodwa elezimota ezinengi njengoNdebenkulu.

Amaphepha la aveza ukuthi uChombo ulezindlu phose emadolobheni wonke elizwe agoqela iHarare, Kariba, Victora Falls, Bulawayo, Mutare, Hwange lakwezinye indawo esingeke saqeda ukuziqamba.

Edolobheni lakoBulawayo khona uChombo ulezindlu ezimbili lezitanda ezintathu.

OwayenguNkosikazi kaChombo, uMarian, uthi ekwehlukaneni kwabo, ufuna ingxenye yenotho yabo egoqela izimota ezilitshumi lanhlanu.

Izimota lezi ziyimihlobo etshiyeneyo ethi ama Mercedes benz amathathu, amaToyota Landcruiser amane, ama Nissan Wolf amabili leminye imihlobo etshiyetshiyeneyo.

UMarian uthi ufuna uChombo amnikeze izitanda lezindlu ezisendaweni ezigoqela iKariba, Binga, Mutare, Hwange, Zwimba, Victoria Falls lezinye ezise South Africa.

Njengomphathintambo obona ngokusebenza kwamakhansili, uzulu uthi uChombo engaba wasebenzisa isikhundla sakhe ukuthola yonke linotho.

Icele leMDC elikhokhelwa nguMnu Morgan Tsvangirai lithi lifuna uChombo axotshwe esikhundleni sakhe ngoba inotho yake le kusobala ukuba uyithole ngendlela engaqondanga.

Kodwa abanye bathi labo abeMDC ngabantu abangethembekanga abanye babo abalenotho esabekayo. Bathi njalo bonke abezombusazwe kumele bachaye egcekeni impahla abalayo nxa bengena ezikhundleni zikahulumende.

UChombo kanye losomabhizimusi, uMnu Phillip Chiyangwa, bake bamangalelwa ngamakhansila edolobho leHarare ukuthi balezitanda abazithola ngudlu kodwa kwabotshwa amakhansila la bona kababuzwanga ngitsho lombuzo oyedwa.

Isikhulumeli senhlanganiso yezakhamizi zakoBulawayo eye Bulawayo Progressive Residents Association uMnu Rodrick Fayayo uthi yinto edanisayo ukuba uChombo ulezindlu ezimbili lezitanda ezintathu koBulawayo khona kulenkulungwane lenkulungwane zabantu abalokhu bekuluhlu lokuthola izitanda.

‚Äč
XS
SM
MD
LG