UMongameli Jacob Zuma weleSouth Africa uzahlangana lenkokheli yeEuropean Union eBrussels ngoLwesibili emhlanganweni we EU-South Africa Summit. UZuma ukhangelelwe ukucela umanyano lo ukuthi wesule zonke izijeziso owazethulela amalunga eZanu PF leleZimbabwe nje jikelele.Lezi zijeziso uthi zenqabela intuthuko yelizwe. I EU yona ikhangelelwe ukubuzisisa uZuma ngokuthi imizamo yakhe yokulungisisa udaba lweZimbabwe sifike kuliphi ibanga.
Inyathelo likaZuma liza ngesikhathi uhulumende womanyano eseke wathumela iqula lakhe le Re-Engagement eBrussels ukuyakhulumisana lalumanyano ngokuvuselelwa kobudlelwano kanye lokwesulwa kwezijeziso.
Kodwa iEU yalile ukuzesula izijeziso lezi isithi ifuna kube lenguquko eqotho kwezokulondolozwa kwelungelo loluntu lakwezombusazwe.
IMelika layo ithi izazesula nxa isisuthiseka ngenguquko esibekhona. Umcebisi kaZuma uNkosazana Lindiwe Zulu uchasisele uNtungamili Nkomo weStudio 7 okunengi ngomhlangano lo.
