UMongameli Jacob Zuma weleSouth Africa, yena ongumlamulankunzi kudaba lweZimbabwe ukhangelelwe ukufika eHarare ngeviki ezayo ngenjongo yokuzama ukuxazulula umbango wezikhundla okhona phakathi kweZanu PF leMDC.
Umcebisi kaMnu Zuma, uNkosazana Lindiwe Zulu utshele iStudio 7 ukuthi uZuma uzathumela iqula lakhe kuqala ukuyalungiselela uhambo lwakhe. Iqula leli lilakho ukuhamba ngempelaviki kumbe ekuqaleni kweviki ezayo, yena uZuma abeselandela.
Kuhambo lwakhe uZuma uzahlangana loMongameli Robert Mugabe, uMnu Morgan Tsvangirai kanye loMnu Arthur Mutambara bekhulumisana ngokudonselana okukhona phezu kokufezwa kwesivumelwano seGlobal Political Agreement.
Lokhu ngokwesibili ukuthi uZuma ahambe eHarare ukuyazama ukulungisisa okuhluphayo selokhu ekhethwe ukuba ngumlamulankunzi yiSadc nyakenye.
Unobhala jikelele wecele leMDC elikhokhelwa nguMnu Morgan Tsvangirai, uMnu Tendai Biti uthi ibandla lakhe selithembele kuMongameli Zuma ukuthi axazulule inkinga ezikhona, esithi kungehlula lokhu bafuna kwenziwe ukhetho olutsha.
NgoLwesithathu khona uMnu Tsvangirai utshele abameli bamanye amazwe eZimbabwe ukuthi inkulumo sezehlule ngoba iZanu PF iqhubeka iqinise ikhanda isala ukuthi isivumelwano seGPA sigcwaliswe.
UMnu Tsvangirai wethule amazwi la emhlanganweni awenzele eHarare ngenjongo yokwazisa abamela amanye amazwe eZimbabwe ngokwenzakalayo kuhulumende womanyano.
