Lanxa kulokujabula okukhuklu kuqembu leChicken Inn ngokungena kuPremier Soccer League, yisililo somkhoba kuqembu leBantu Rovers lona elikhanya libhekane lezembe elilakho ukulihlahlela liphume kuLeague lonyaka.
I Bantu Rovers yiyo esemsileni wengalane yemiklomelo kuPSL.
Phakathi kwemidlalo engamatshumi amabili lane, 24, esiyidlalile, yenelise ukunqoba kwemithathu kuphela zwi njalo yabhuqwa kwelitshumi lanhlanu, 15.
Iqembu leli lilemiklomelo elitshumi lanhlanu kuphela. Amanye amaqembu akhanya ebhekwe yimpisi kuPSL lonyaka agoqela i FC Victoria, Douglas Warriors leShooting Stars.
Ukuzivikela kucuku lwezembe le relegation, iBantu Rovers kumele inqobe kumidlalo yayo yonke eseleyo lamaqembu afana leHwange, iHighlanders lamanye.
NgoLwesihlanu khona iBantu izadlala leGunners eHarare.
Unobhala jikelele waleliqembu uMnu Wilbert Sibanda uthe lanxa kulempawu zokubana umntwana ulakho ukufa, kakafuni ukulahla imbeleko.
