Izakhamizi zedolobho lakoBulawayo zibikwa zivuke ubhova ngempelaviki zatshingela izisebenzi zenkampani yamandla kagetsi, iZESA lezenkampani yencingo iTELONE phezu kwenhlawulo ezithi iphezulu kakhulu.
Lokhu kubikwa kwenzakalele emihlanganweni ebiqoqwe ngenye yenhlanganiso ezimela izakhamizi kuleli dolobho eyeBulawayo Progresive Residents Association emalokitshini atshiyeneyo.
Umphathintambo obona ngokwenzakala emawofisini enhloko kahulumende, uMnumzana Gorden Moyo laye uphatheke emihlanganweni le echasisela izakhamizi ngenhlelo zikahulumende njalo esizwa izikhalazio zazo.
UMnumzana Rodrick Fayayo, obona ngokuqhutshwa kwenhlelo zalinhlanganiso utshele uNtungamili Nkomo weStudio 7 ukuthi izakhamizi ziphose zabhaxabula izisebenzi zeZESA ngoba zingazwisisi ukuthi kungani inhlawulo zazo zihlala ziphezulu wona amagetsi ehlala engekho.
