Abamela ibandla leZanu PF lamacele womabili eMDC kunkulumo zokuzama ukulungisisa okuhluphayo kuhulumende womanyano bahlangene ngoMvulo eHarare bakhulumisana ngokuhluphayo kuhulumende kulokufuthelana okukhulu.
Ukufuthelana lokhu kuqhamuke ngempelaviki kulandela ukukhulumisana kubi phakathi kwecele leMDC elikhokhelwa yinhliko kahulumende, uMnu Morgan Tsvangirai lecele elikhokhelwa nguMnu Arthur Mutambara phezu kwenkulumo lezi.
Ibandla likaTsvangirai lethese elikaMutambara leZanu PF umlandu wokudonsela muva ekuthini inkulumo ziqhutshwe ngokuphangisa, kuthi elikaMutambara lona lisole iZanu pf lecele likatsvangirai lisithi amabandla la yiwo angazimiselanga ekuthini kulungiswe okuhluphayo ngokuphangisa.
Abazi ngokwenzakalayo bathi umhlangano wangoMvulo ubujonge ukuhlaziya, ikakhulu iziloyiso ezethulwe liqula leSadc Troika elike lethekelele eZimbabwe ngenyanga edluleyo. Esinye seziloyiso lezi ngesokuthu usibalukhulu webhanga elikhulu lelizwe uMnu Gideon Gono asuswe esikhundleni.
USenator David Coltart oweMDC kaMutambara utshele iStudio 7 ukuthi ibandla lakhe lifuna konke okuhluphayo kulungisiswe ngokuphangisa, esithi ukuthethisana okwenzakalayo phakathi kwamabandla akuhulumende lo akuncedi ngalutho.
Ingcwethi ecubungula ezombusazwe, uMnu Rejoice Ngwenya utshele uNtungamili Nkomo weStudio 7 ukuthi ukukhulumisana kubi osokukhona phakathi kwamabandla la kuphazamisa kakhulu inkulumo.
