Inkulumo phakathi kweZanu PF lamacele womabili eMDC ziqalile njalo eHarare ngolweSihlanu kulokufuthelana okukhulu ngenxa yezinqumo ezithethwe yiZanu PF emhlanganweni wayo weCongress ngeviki edluleyo.
Abakhokheli bamabandla la balaye abameli babo kunkulumo lezi ukuthi babe sebeqedile ukukhulumisana ngoMvulo. I Zanu PF inqume emhlanganweni wayo ngeviki edluleyo ukuthi inkokheli yayo ekuhulumende ingaze yavuma ukuthi uMnumzana Gideon Gono loMnumzana Johannes Tomana basuswe ezikhundleni zabo.
I MDC ekhokhelwa nguMnumzana Morgan Tsvangirai yona ibikwa ifuna ukuthi umphathintambo weZanu PF wogatsha lwendaba zaphakathi kwelizwe uMnumzana Kembo Mohadi esuswe esikhundleni sakhe ngoba isithi kasebenzelani kuhle lomphathintambo wayo uMnu Giles Mutseyekwa.
Lokhu kuphume kugwalo oluphiwe uMongameli Mugabe, uTsvangirai kanye loMutambara ngabameli babo kunkulumo ngeviki edluleyo. Abathathu laba bona bazahlangana ngoMvulo bekhulumisana ngokuhluphayo kuhulumende womanyano lo.
Ingcwethi ecubungula ezombusazwe uMnu George Mkhwanazi utshele uNtungamili Nkomo weStudio 7 ukuthi kukhanya kungela kuzimisela phakathi kwamabandla akhulumisayo.
