WASHINGTON DC – Ababalisi bathi bayethuselwa yiziphathamandla zikahulumende phezu kwesinqumo sabo sokusebenza okwamalanga amabili kuphela ngeviki, okuyisikhathi abathi sihambelana leholo labo.
Umkhokheli wenhlanganiso yababalisi bemaphandleni, iAmalgamated Rural Teachers Union of Zimbabwe (ARTUZ), uMnu Obert Masaraure, uthi ababalisi abalamali yokuya emsebenzini lanxa uhulumende ebengezelele iholo ngesilinganiso sokungamatshumi amabili ekhulwini, 20 percent.
Iphephandaba leChronicle libike namuhla ukuba ugatsha lwezemfundo solulobele iziphathamandla zalo ezabelweni zonke zelizwe ezitshela ukuthi zijezise ababalisi abakhalale umsebenzi ekuvulweni kwezikolo.
Isikhulumeli seARTUZ, uMnu Thembakuye Moyo, utshele iStudio 7 ukuthi lanxa besethuselwa, bazaqhubeka befundisa kabili kuphela ngeviki uhulumende eze ekhuphule iholo labo lifike kuUS$540.
Lumsakazo awenelisanga ukukhuluma lesikhulumeli sogatsha lwezemfundo uMnu Taungana Ndoro.
Kusenjalo, amapholisa ancitshe inhlanganiso yeProgressive Teachers Union of Zimbabwe (PTUZ) imvumo yokutshengisela eHarare namuhla ikhonona ngeholo lababalisi abakhala ngokuthi alibenelisi lutho.
Facebook Forum