WASHINGTON DC – UMongameli weMelika uMnu Joe Biden uzakwethekelela ezwekazi leEurope kusasa ukuyakhulumisana lenkokheli zamazwe akumanyano weNATO phezu kokuhlaselwa kweleUkraine ngeleRussia.
Lumhlangano uzaqhutshelwa eBrussels kweleBelgium.
Isikhulumeli sesigodlo seWhite House uNkosikazi Jen Psaki utshele intathelizindaba ukuthi esuka eBelgium, uBiden uzakuya kwelePoland ngoLwesihlanu ukuyakhulumisana loMongameli walelolizwe mayelana ngalimpi.
ElePoland lingumngane weMelika obalulekileyo ngoba lilenkamba zamabutho alelilizwe.
ElePoland selamukele njalo iziphepheli ezibalekela impi yeUkraine ezedlula izigidi ezimbili, 2 million.
Izolo uBiden ukhulumisane ngocingo loMongameli weFrance uMnu Emmanuel macron, oweGermany uOlaf Scholz, oweleItaly uMario Draghi kanye lomholi weleBhilithani uMnu Boris Johnson phambilini komhlangano wabo lo oweNATO-EU Summit.
Umhlangano lo uza ngesikhathi ukulwisana phakathi kweUkraine leRussia kusiya phambili njalo eleUkraine likhala ngokuthi amabutho eRussia abulala labantu makhaza abangahlomanga.
Ohlaziya ezombusazwe uMnu Tim Muringai utshele iStudio 7 ukuthi uhambo lukaBiden eEurope lolu lubalulekile kakhulu.
