WASHINGTON DC - Amapholisa asethule imininingwane ehlasimulisa umzimba eveza ukuthi ilunga leCCC uNkosazana Moreblessing Ali wabulawa njani nguPius Jamba, yena obotshwe ngoLwesine.
Isikhulumeli samapholisa, uMnu Paul Nyathi, uthi uJamba wabulala uMoreblessing ngosuku amthumba ngalo mhlaka 24 ngenyanga edluleyo.
Uthi ngemva kokumhudulela ehlathini eChibhanguza Shopping Center, eChitungwiza, uJamba wabulala uAli wasefihla isidumbu sakhe.
Esuka lapho, uJamba waya ngakibo wayathatha ingqamu ayisebenzisa ukuqumaquma isidumbu lesi wasethwala izitho ezitshiyeneyo ngesaka esiyazijikela emthonjeni wangakibo eNyatsime.
Amapholisa athi asaphenya ukuthi uJamba wenza lokhu eyedwa na kumbe ukhona asebenza laye. Kodwa aqina njalo ngokuthi udaba lolu alulani lokwenza lezombusazwe.
Kolunye njalo udaba, ibandla leCCC lithi kulomsekeli walo wesibili uMnu Edison Chinembiri, obulawe ngabanakanelwa ukuthi ngabasekeli beZanu PF eZengeza ngoLwesibili kulandela ukuchithwa kwabantu esililweni sikaMoreblessing ngabebandla elibusayo eNyatsime.
I-CCC ithi amapholisa kumele aphenye loludaba ngokuphangisa njalo kubotshwe labo ababulala uChinembiri.
Isikhulumeli samapholisa, uNyathi utshele iStudio 7 ukuthi ubengenelisi ukukhuluma ngaloludaba ngoba ubephathekile.
