WASHINGTON DC - Ukufuthelana kuya phambili phakathi kweCCC leZanu PF phezu kokubotshwa mahlayana kwamalunga eCCC phambilini kokhetho oluzakwenziwa kunyanga ezimbalwa ezilandelayo.
Ukufuthelana lokhu kudlondlobaliswe yikubotshwa kwamalunga eCCC angamatshumi amabili lasithupha, 26, agoqela amalunga edale lephalamende amabili, uMnu Amos Chibaya omela iMkoba kanye loMnu Costa Machingauta omela isigaba seBudiriro.
Abasolwa babotshwe kumaviki phose amabili edluleyo eBudiriro besetheswa icala lokwenza umhlangano ngaphandle kwemvumo yamapholisa. Balokhe bevalelwe njalo amagqwetha ayaqhubeka ngemizayo yokuthi bakhululwe ngemali yesibambiso, i-bail.
Abantu laba babotshwe bebuthene endlini kaMachingauta lanxa nje umthetho ungatsho ukuthi abantu kumele bazise amapholisa nxa besenza imihlangano ezindlini zabo kumbe endaweni ezingayisizo zomphakathi.
Umeli weZengeza West edale lephalamende uMnu Job Sikhala yena uselenyanga eziyisikhombisa, 7, evalelwe ngemva kokubotshwa esetheswa amacala okuphehla udlakela. Uyawalandula lawa macala.
Umholi weCCC uMnu Nelson Chamisa uke waya emthethwandaba kuliviki ukuyasekela abasolwa lapho akhulumisane khona labo ebapha isibindi phambili kokumiswa kwabo phambi kukamatshi becela i-bail.
UChamisa usole kakhulu ukubotshwa kwabantu laba esithi bayahlukuluzwa nguhulumende weZanu PF ngoba esesaba ukunqotshwa kukhetho.
Khepha abeZanu PF bathi abasekeli beCCC bayabotshwa ngoba besephula umthetho ngokwenza imihlangano bengelamvumo yamapholisa.
Kodwa umbuzo osemlonyeni yabanengi ngothi kanti kungani kuhlala kubotshwa abeCCC kuphela abeZanu PF bengabotshwa kodwa labo besenza imihlangani.
“Eyethu imihlangano iyabe isaziwa ngamapholisa, iyabe ibikiwe emapholiseni,” kutsho ilunga leZanu PF uMnu Believe Gaule ekhuluma kungxoxompikiswano ayenze lelunga leCCC uMnu Abednico Bhebhe, abilawulwa yiStudio 7.
Uqhubeke esithi, “Ngingazi njalo ukuthi ingabakhona eminye imihlangano eyabe ingabikwanga emapholiseni, kodwa lokho angilalwazi lakho. Engikwaziyo yikuthi imihlangano yethu iyabe ibikiwe emapholiseni.”
Kodwa uBhebhe usole kakhulu ibandla leZanu PF esithi ukwenza kwalo “ngokwabathakathi” kumbe “uSatane.”
UBhebhe uthe umhlangano owabotshelwa uChibaya loMachingauta labanye babo abalokhe bevalelwe, wawungadingi imvumo yamapholisa ngoba wawusenzelwa endlini yelunga labo engafinyelelwa ngumphakathi.”
Facebook Forum