WASHINGTON DC - Umkhokheli webandla leCCC uMnu Nelson Chamisa namuhla uchothoze isinqumo somthethwandaba weHigh Court esokwala ukubamba iZimbabwe Electoral Commission (ZEC) ngamandla ukuthi iveze uluhlu lwabantu abalelungelo lokuvota olusebulenjini, olwe-electronic voters roll.
NgoLwesibili umthethwandaba lo ulahle isicelo someli weHarare North edale lephalamende njalo olilunga leCCC uMnu Alan Markham, yena obefuna iZEC iphoqwe ukwethula i-voters roll ukuze ayihlaziye phambilini kokhetho.
Umahluli uthe iZEC ayephulanga mthetho ngokwala ukuveza loluluhlu ngoba lulakho ukuphathwa kubi yizigilamkhuba.
Kodwa uChamisa ukusolile lokhu esithi akulakhetho olungaqhutshwa ngendlela esuthisayo njalo ekhululekileyo ngaphandle kokuthi abancintisayo babone i-voters roll.
Emazwini awethule enkundleni yeTwitter awaqondiswe kuMongameli Emmerson Mnangagwa lakuZEC, uMnu Chamisa uthe ukwala le-voters roll kuzabangela ukuthi impumela yokhetho ingamukelwa, khona athi yinto etshiya eleZimbabwe lisesimeni esibi.
Ngokunjalo, uthe i-voters roll kumele ivezelwe abancintisayo lozulu kungakayiwa kukhetho.
Facebook Forum