WASHINGTON DC - Ibandla leCCC lithi kumele kubunjwe iqula lengcwethi ezivela phandle kwelizwe elizaphenya udaba lokutshontshwa kwegolide yizigilamkhuba ezithi zisebenza loMongameli Emmerson Mnangagwa.
Inkuthazo le iza ngemva kwefilimu ethulwe ngumsakazo weAl Jazeera eveza ukuthi izigilamkhuba lezi zingena njani eZimbabwe lemali engcolileyo etholakale ngendlela ezingekho emthethweni lokuthi igolide zilikhupha njani elizweni ngudlu zisiyalithengisa eDubai.
ICCC ithi bonke abathinteka kuloludaba kumele babotshwe bajeziswe. I-Al Jazeera yethule ihlandla lesibili lalifilimu izolo elilesihloko esithi Gold Mafia: Smoke & Mirrors.
Kulelihlandla uMnu Rikki Doolan, osebenza lesikhonzi sikaMnangagwa uMnu Uebert Angela, utshela intathelizindaba zeAl Jazeera ukuthi uyenelisa ukuzincedisa ukungenisa imali efika kuUS$1,2 billion eZimbabwe etholwe ngendlela ezingekho emthethweni, i-money laundering, ziyeyisebenzisa ukuthenga igolide zibe sezisiyalithengisa eDubai.
Owake waba ngumcebisi kaMnangagwa utshele umsakazo weal Jazeera izolo uAngel usethathelwe ipassport yakhe wamiswa umsebenzi nguMongameli.
Kodwa ngoLwesihlanu isikhulumeli sikaMnangagwa, uMnu George Charamba, yena obikwa esebenzisa elinye igama kuTwitter, wethule umbiko esithi lokho ngamanga aluhlaza.
Olwela amalungelo oluntu njalo ehlaziya ezombusazwe uMnu Difa Dube utshele iStudio 7 ukuthi nxa uMongameli Mnangagwa engumkhokheli oqotho, kumele aphume egcekeni azise uzulu weZimbabwe ukuthi uphathekile na kumisebenzi yokuhuquluza inotho yelizwe njengokukhulunywayo kumbe uqanjelwa amanga.
