Abathengisa impahla kweleBotswana bakhala ngemithetho kahulumende kanye lokusilela kwemali besithi lokhu kubuyisela emuva amabhizimusi abo.
UMnu Edwin Malaba walahlekelwa ngumsebenzi ngomnyaka ka2008 ngesikhathi esebenza kwenye ifekithali ethengisa imithi yezifuyo.
Kodwa ukuvaleka komnyango lo kwamvulela indlela eya kweleBotswana lapho asethengisa khona imithi efanayo.
UMalaba uthi lanxa bekulenzuzo ayitholayo, uhlupho yimithetho kahulumende eqonqosela ukuthi amabhizimusi aqale ahambise imali ebhanga engakayisebenzisi.
Uthi lokhu sekumbulele kakhulu ngoba noma efisa ukuthenga okunye eBotswana, kenelisi ngoba kumele aqale ayefaka imali ebhanga eZimbabwe.
Amazwi kaMalaba agcizelelwe ngosakhulayo uMnu Mthabisi Khuzwayo yena othengisa amaCD lamaDVD.
Uhulumende uqhubeka ezama ukumunya okuncane okutholwa ngabaphila ngokuthenga lokuthengisa ngaphandle kwelizwe, ikakhulu ngokukhweza imithetho abayibhadala kugatsha lweZimbabwe Revenue Authority (ZIMRA).
