Lanxa uzulu weZimbabwe ebhekane lendlala emmangalisayo, izakhamizi zakoMbimba, ePlumtree ziphakathi kwehlobo njalo zithi zizayibhuqa inala lonyaka.
Izakhamizi lezi zibe lomthimba wokuthakazelela isivuno sazo ngoLwesithathu.
Zithi izulu libe linengi endaweni yazo ngoba zilandele isiko lendulo zayacela izulu koManyangwa.
“KoMbimba ngapha izulu lasenzela imihlolo lana kakhulu latshiya oHingwe laba laboBambadzi laboMadlambudzi laboNdolwane,” kutsho isakhamuzi uMnu Moki Ncube.
“Amakhabe lawa siphosana ngawo, ondumba laba angikhulumi. Sesikhala nje ngokuthi indlovu zingasihlaseli.”
Izigaba zePlumtree ezinengi zivame ukuhlaselwa zinyamazana zendle emasimini, ikakhulu indlovu eziyabe ziphume eHwange National Park.
UMnu Ncube uthe izilimo abazithole kakhulu zigoqela inyawuthi, umumbu, amakhabe lamazambane.
Wengeze wathi akala kuthandabuza ukuthi izulu lana kakhulu esigabeni sabo ngoba balandela isiko lendulo bayacela izulu.
“Saya koManyangwa, hayi izibusizo zabuya sibili labangathembiyo bacina ethemba ukuthi amasiko ayasebenza,” kugcizelele uNcube.
