WASHINGTON DC - Isigebengu esibotshelwe elokitshini leTembisa kweleSouth Africa izolo satholakala silemibhobho eyisitshiyagalolunye, 9, lamayunifomu amapholisa, esingesinye sezigebengu ezilwisane lamapholisa eRosettenville ngoMvulo, yisizalwane seZimbabwe.
Lokhu kuvezwe ngusikomitshi wamapholisa esigabeni seGauteng uMnu Elias Mawela ekhuluma lentathelizindaba.
Esinye isiphathamandla sikahulumende walesisigaba, uNkosikazi Faith Mazibuko - eloba enkundleni yeTwitter - uthe bakholwa ukuthi lumsolwa nguye owadubula i-helicopter yamapholisa ngesikhathi elwisana lezigebengu ezingamatshumi amabili lanhlanu, 25, ezigoqela ezinye izizalwane zeZimbabwe, ezazizame ukubamba imota ethwala imali inkunzi.
Lumsolwa ukhangelelwe ukumiswa enkantolo namuhla, ngokutsho kogatsha lweDirectorate for Priority Crime Investigation (Hawks).
Ukubotshwa kwakhe kutsho ukuthi sebelitshumi lanye, 11, asebebotshiwe phezu kwesehlakalo lesi. Abayisitshiyangalombili, 8, badutshulwa ngamapholisa bafa.
Amapholisa ethule amabizo abasolwa abalitshumi abamiswe emthethwandaba ngoLwesithathu, abagoqela abeZimbabwe, ababalisa uSihle Mazibuko, 35, Qaphela Ngubeni, 33, Menzi Shabalala, 47, Hloniphani Dube, 40, Alex Matshebele, 40, Phendula Mvubu, 44, Mike Ngwadi, 47, Andrew Tshobolo, 67, Khulekani Nkosi, 36, loKitso Mnguni, 45.
