WASHINGTON DC - Ukukhuphuka kwentengo yezinto mnyaka ngomnyaka, i-year-on-year inflation, ikhwelile ngesilinganiso esikhulu isuka ku-191 percent ngenyanga edluleyo yaya ku-256 percent kulinyanga.
Lokhu kwaziswe ngempelasonto lugatsha lukahulumende olubona ngezamanani olweZimbabwe National Statistics Agency (ZimStats) lona oluthi umuntu oyedwa usedinga imali engangeZW$24,479 ngenyanga ukuze ephile kuhle.
Owake waba ngumphathintambo wezemali njalo eyisiphathamandla sebandla leCCC, uMnu Tendai Biti, yena uthi i-inflation isikhwele yafika kumakhulu amahlanu, 500 percent, okuyinto ephikiswa nguhulumende.
Imali yeZimbabwe iqhubeka ilahlekelwa luhlonzi ngitsho lasemkambo kahulumende lapho idola leMelika elilodwa elithenga khona amadola akuleli aphezu kwamakhulu amane, $416.
Emkambo wensitha khona idola leMelika lithengwa ngamadola eZimbabwe adlalela kunkulungwane, 1,000.
Isikhulumeli senhlanganiso yabathengi, iNational Consumer Rights Association, uMnu Effie Dlela Ncube, utshele iStudio 7 ukuthi ukukhwela kwe-i-inflation ngezinga elikhulu kangaka kuveza sobala ubunzima abantu beZimbabwe ababhekane labo.
