WASHINGTON DC - Abebandla leZapu kanye labeZimbabwe Lawyers for Human Rights bathi sebesiya enkantolo ukuyaphikisa ukukhwezwa kwemali ebhadalwe ngabazancintisa kukhetho oluzayo labafuna ukucubungula ugwalo lwe-voters roll.
IZimbabwe Electoral Commission (ZEC) yazise ngoLwesihlanu ukuthi isikhuphule imali ebhadalwa ngabancintisa kusikhundla sikaMongameli welizwe isuka kunkulungwane eyodwa yamadola eMelika, US$1,000 yaya kuUS$20,000.
Abadinga ukuba ngamakhansila, bona ekade bebhadala amatshumi amahlanu amadola, US$50, sebezahlawula inkulungwane eyodwa yamadola eMelika, US$1,000.
Abafuna ukuhlola ukhetho, ama-election oberserves, bona sebezabhadala imali esukela kuUS$100 isiya kuUS$400.
Abafuna uluhlu lwabantu abazavota, i-voters roll, sebezabhadala imali esukela kuUS$10 isiya kuUS$150.
Isikhulumeli sebandla leZapu uMnu Msongelwa Ndlovu utshele iStudio 7 ukuthi bazacela inkantolo maduze ukuthi iphoqe iZEC ukuthi yehlise limali.
