WASHINGTON DC - Ikhomishini ebona ngokuqhutshwa kokhetho, iZimbabwe Electoral Commission, isivumile ukuthi abanye babantu abazinkulungwane phose ezine, 3,988, abaleminyaka edlula ikhulu, 100, abakuluhlu lwabalelungelo lokuvota kukhetho oluzayo kungenzeka ukuthi kudala batshona.
Isikhulumeli seZEC uMnu Jasper Mangwana ukuvumile lokhu ngemva kokuthwaliswa nzima ngabantu enkundleni yeTwitter besithi ikhomishini yakhe izama ukuqilibezela kukhetho oluzayo ngokwethula inani lamakhehla lezalukazi ezingekhoyo.
UMangwana uthe omunye walababantu uleminyaka elikhulu elilamatshumi phose amabili, 118. Wethule njalo isithupha somunye njengobufakazi.
Lanxa kunjalo, ingcwethi ehlaziya ezombusazwe uMnu Effie Dlela Ncube, uthi iZEC igila imikhuba.
“Ukuthi kube labantu abanengi kangaka abaleminyaka edlula ikhulu kuveza sobala ukuthi i-voters roll le idinga ukuhlanjululwa kukhitshwe izinto ezifana lelezo,” kutsho uMnu Ncube.
“Alikho ilizwe elingange Zimbabwe elilempilo enzima kangaka abangaba leminyaka edlula ikhulu abanengi kangaka, yebo bengaba khona ababili abathathu kodwa ukuthi babe phezu kwenkulungwane ezintathu kuyasolisa.”
Kusenjalo, uMangwana ukuvumile njalo ukuthi ngempela uzulu weVictoria Falls uhamba umango omude ofika kumakhilomitha alikhulu, 100 km, ukuyabhalisela ukuvota eHwange ngoba iZEC ayila mahofisi eFolosi.
Lokhu kulandela ukukhalakhala kwabantu beVictoria Falls kudaba olwethulwe yilumsakazi kuzindaba zekuseni ngoLwesine.
UMangwana utshele iStudio 7 ukuthi zinengi indawo ezilodubo olufanayo, ezigoqela iChikombedzi eseChiredzi, lapho athi abantu bahamba umango odlula amakhilomitha alikhulu elilamatshumi amahlanu, 150 km, ukuyabhalisa emahofisini ekhomishini yakhe.
Kodwa uthi bazathatha amanyathelo okulungisisa loludaba.
“I-ZEC ilamahofisi okubhalisa abantu angu-73, angu-63 ngama district offices kuthi alitshumi ngama-provincial officies. I-Hwange district yiyo ethinta iVictoria Falls, amahofisi ethu okubhalisa abantu aseHwange,” kutsho uMnu Mangwana.
“Kodwa ikhomishini yethu izasebenzisa ezinye indlela ukwenzela ukuthi kube lula ebantwini ukuthi babhalisele ukuvota. Kufana labaseChikombedzi, eChiredzi, bahamba umango odlula 150 km ukuyabhalisa.
“Kodwa sizathatha amanyathela ukuze abantu babhalise besendaweni abahlala kuzo. Udubo nje yimali. Kodwa sizathatha amanyathelo ukuthi abantu bathole usizo njengoba sisiya kukhetho,” uqhubeke echasisa uMangwana.
Facebook Forum