Zinengi inhlanganiso ezizimeleyo eseziguqule impilo zezakhamizi zemaphandleni ngokuzincedisa ngenhlelo ezitshitshiyeneyo zentuthuko.
Inhlanganiso lezi zigoqela iPro Africa Development Trust, yona esebenza lozulu weMatabeleland ukuvuselela amadamu lokusungula inhlelo zokulima ngokuthelezela.
IPro Africa yasungulwa ngomnyaka ka2000 njalo isivule inhlelo zokuthelezela (irrigation schemes) ezedlula amatshumi amahlanu.
Ithi lanxa zikhona inhlelo eziqhubayo eMatabeleland North, igxile kakhulu eMatabeleland South ngoba lindawo ayitholi izulu elaneleyo, ngakho inengi lezakhamizi lidinga ukuncediswa ngenhlelo zamanzi lokulima.
“Amadamu amanengi asegqibelekile,” kutsho umqondisi walinhlanganiso uMnu Velenjani Nkomo kungxoxo ayenze lomsakazo weStudio 7.
“Ngakho ke sabuya lohlelo lokuthi sengezelele imbundo lama-spill ways lapho idamu elichitha khona ukuze ebambe amanzi amanengi; luhlelo oluqakathekileyo lolo.”
