Inhlanganiso eziphathisa abalambayo ziqhubeka zisengeza imizamo yazo yokudingela uzulu weZimbabwe ukudla nanku indlala isihlasele ngamandla.
Inhlanganiso lezi zigoqela ekahulumende weMelika iUSAID, yona ephe iWorld Food Program (WFP) izigidi ezingamatshumi amabili zamadollar, i$20 million, ezasetshenziswa kunhlelo zokulwisana lendlala.
Isiphathamandla salinhlanganiso uMnu Thabisani Moyo utshele iStudio 7 ukuthi ngaphandle kokudla okuzathengwa yimali le, iUSAID isebenza lozulu wemaphandleni ukuthuthiksa impilo yakhe ngendlela ezehlukeneyo.
“EMatabeleland sibambisane lenhlanganiso yeCultivating New Frontiers for Agriculture ezigabeni ezifana leTsholotsho, eMangwe, eBulilima leGwanda sinika imuli imfundiso ngendlela zakulezinsuku ezokulima,” kuchasise uMnu Moyo.
“Sikhangele njalo imisebenzi yokufuya lokugcinwa kuhle kwezifuyo ezifana lembuzi, inkomo lenkukhu. Sisebenzela njalo ezibhedlela lemakiliniki lapho esisebenze labomama abazithweleyo labantwana ngenjongo yokuqeda imikhuhlane ebangelwa yikuswela ukudla okwaneleyo.”
UMoyo wengeze wathi omama abazithweleyo bafundiswa ngokuziphatha kuhle lokuthi kudla bani abamele bakudle ukuze babe labantwana abaphile kuhle.
“Abantwana bona baphiwa ukudla okwakha umzimba kuthi omama abathola ukudla ngesikhathi bemunyisa bayathola njalo imfundiso ezakwenza benelise ukuzilimela ukudla okulungele abantwababo lemuli zabo,” uqhubeke echasisa uMoyo.
IUSAID ithi bazinkulungwane ezilikhulu abantwana abaphansi kweminyaka emihlanu abalambayo asebecake okwedlulise amalawulo asebelomkhuhlane wemalnutrition.
Uhulumende uthi abantu abalambayo eZimbabwe abamele bancediswe ngokudla lonyaka bedlula izigidi ezine, 4 million.
Your browser doesn’t support HTML5
Ingxoxo loMnu Thabisani Moyo