Lanxa isambuzi esisetshenziswa nguzulu wemaphandleni (blair toilet) sasungulwa eZimbabwe, imizi eminengi lokhe ingelasambuzi uzulu ezinceda ngokuya egangeni.
Iblair toilet yasungulwa ngeminyaka yabo1970 nguMnu Peter Morgan ngenjongo yokulondoloza impilakahle kanye lokuhlanzeka kukazulu wemaphandleni.
Ingcwethi kwezempilakahle zithi kubalulekile ukuthi yonke imizi ibe lesambuzi ukuze kwenqatshelwe imikhuhlane efana lesihudo elakho ukubangelwa yingcekeza etshiywa ngabantu mahlayana nje egangeni.
“Ukusebenzisa izambuzi yinto eqakatheke kakhulu ngenxa yokuthi kulemikhuhlane eminengi evela kungcekeza esiyilahla ezambuzini,” kutsho udokotela Annete Moyo.
“Nxa ingcekeza leyo singasayilahlelanga endaweni eqondileyo enjengesambuzi kuyabe sokusitsho ukuthi imikhuhlane eminengi isingathelelwana kalula ngenxa yokuswelakala kwezambuzi.”
Yiphi ke imikhuhlane le?
“Ngizaqalisa ngomkhuhlane oke wasethusa sonke eZimbabwe kubo2008-2009, oweCholera. Umkhuhlane lo ubangelwa ligciwane eliphiwana ngokunatha amanzi kumbe ukudla okungahlanzekanga,” uqhubeke echasisa udokotela Moyo.
“Eminye imikhuhlane igoqela ibilharzia kumbe ngithi isichenene esithelelwana ngokuthi umuntu achemele emanzini azaphinda asetshenziswe ngabanye abantu, bengabe benga bhukutsha phakathi kwawo kumbe bewatsha ngawo.”
Ngakho, kuqakathekile ukuthi izakhamizi zibe lezambuzi ukuze kwenqatshelwe imikhuhlane efana lale, kutsho uMaMoyo.
Ingcwethi zithi kubiza imali ephakathi kwe$150 le$200 ukwakha isambuzi esisodwa.
