Amalunga edale lephalamende ngoLwesine athwalise gadalala umphathintambo obona ngendaba zasekhaya, uMnu Ignatias Chombo, phezu kokugqilazwa kwabesifazana beZimbabwe kwamanye amazwe afana leKuwait.
Ukugqilazwa kwabesifazana laba kuvele kumaviki amblalwa edluleyo njalo bafika phose ikhulu asebehlengiwe zinhlanganiso ezizimeleyo zincedisana lohulumende.
Amalunga abuzisise Chombo ukuthi kungani amapholisa esehluleka ukubona ukuthi kulezigelekeqe ezihuga abantu ngemisebenzi ekwamanye amazwe kodwa bathi befika khonale bagqilazwe.
UChombo uphendule wathi uhulumende wenza konke okusemandlani akhe ukwenqabela ukuganga lokhu.
“Simbuzile uChombo ukuthi kwenzakala njani ngaphansi kwamakhala amapholisa esiwabona ebukhali kangaka kwezinye izigaba kodwa kuloludaba yindaba bengatshengisi ubukhali babo,” kutsho uNkosikazi Sithembile Mlotshwa.
UMaMlotshwa nguSenator weMatabeleland South njalo lilunga lebandla leMDC-T.
