Abalwela amalungelo abesifazana bathi ukubhidlika komnotho kwenza kube nzima ukuqeda udubo lwamantombazana aba lezisu isikhathi sawo sokuba ngomama singakafiki.
Uphenyo olwenziwe nguhulumende phansi kwesihloko esithi Zimbabwe Demographic Health Survey (ZDHS) luveze ukuthi amankazana ahlala emaphandleni yiwo ahlangana kakhulu laloludubo ukwedlula ahlala emadolobheni.
Uzulu uthi imbangela yikuthi abantu bemaphandleni balenswelo ezinengi, okucina kubangela ukuthi abantwana benze imisebenzi engafanelanga ukuze bakhone ukuziphilisa.
Impumela yaloluphenyo ithi iMatabeleland South ngesinye sezigaba ezibhekane lodubo lolu kakhulu. Isigaba lesi sihlaselwe njalo yindlala enkulu lonyaka.
“Abantwana bayabe bezama ukuthi bazincede ukuthi mhlawumbe engathandana lalo angamsiza,” kutsho ummeli weGwanda Central edale lephalamende uNkosikazi Nomathamba Ndlovu.
UNkosikazi Ndlovu wengeze wathi abagebha igolide ngaphandle komthetho eMatabeleland South ababizwa ngoMakorokoza, labo balesandla kuloludubo.
Yebo abantwana bengaba sebekhomba mahlayana ngoba bezama ukuziphilisa; kodwa imbeko yona basalayo na kumbe sebengumhlambi kazelusile?
“Singeke sathi ayiseko imbeko ebantwaneni bonke, abanye sibili baseselayo. Kodwa abanengi sebelahlekelwa yimbeko ngenxa yomumo welizwe,” uqhubeke echasisa uNaNdlovu.
Ukhuthaze njalo abazali ukuthi balaye abantwababo lanxa nje abanye besithi kulihlazo ukuthi umzali akhulume ngedaba zocansi lomntwana.
