Izakhamizi zeTsholotsho zibikwa sezihlalela evalweni zisesaba izilwane esezibulele izifuyo ngemva kokufohla eHwange National Park.
“Umumo mubi kakhulu esigabeni sakithi ngapha emhlubulweni ogoqela uWard 3, lo4 lo1 lapho izilwane eziphume khona ngale ecingweni zisiza ebantwini,” kutsho isakhamuzi uMnu Believe Gaule.
“Izilwane lezi zikhanya zizinengi sibili njalo zilabantwana. Sezidle inkomo, imbuzi lamadonki; abantu labo sebehlalela evalweni,” uGaule, yena owake wamela isigaba lesi edale lephalamende, uqhubeke echasisa.
Uthi njalo okudanisayo yikuthi abadlelwe izifuzo zabo laba kabasoze bahlawulwe lanxa nje ugatsha lweCampfire lwaluke lwathembisa ukuthi abehlelwa yilokhu bazahlawulwa.
Ngaphandle kwezilwane, iTsholotsho ibhekane lendlala embi lonyaka. Amanzi lawo ayasilela emadamu ngoba izulu kalizange line ngemfanelo.
“Izulu alizange line kuhle njalo izilimo ezilutshwana ezazikhona zabulawa lilanga; ngokunjalo abantu bakithi babhekane lendlala emangalisayo lonyaka,” kutsho uGaule.
